Томуу, томуу төст өвчнөөр өвдсөн хүүхдүүд өрх, сум, тосгоны эрүүл мэндийн төвдөө эмчийн заалтаар өдрийн эмчилгээ хийлгэж, шаардлагатай эмийн эмчилгээгээ эрүүл мэндийн даатгалаар үнэ төлбөргүй авах боломж бүрджээ.

Эрүүл мэндийн яамнаас томуугийн улирлын бэлэн байдлыг хангах чиглэл ирүүлсний дагуу 2026 оны аравдугаар сарын 1-нээс эхлэн өрх, сум, тосгоны эрүүл мэндийн төвүүдэд хүүхдийн өдрийн эмчилгээний санхүүжилтийг нэмэгдүүлэн ажиллаж байна. Энэ нь хүүхдэд шаардлагатай тусламж, үйлчилгээний хүртээмжийг нэмэгдүүлэх, эцэг эх, асран хамгаалагчдын санхүүгийн ачааллыг бууруулах зорилготой юм.

Нэг хүүхдийн өдрийн эмчилгээний багцын санхүүжилт 100 мянган төгрөг бөгөөд уг зардлыг Эрүүл мэндийн даатгалын сангаас бүрэн хариуцна.

Өдрийн эмчилгээнд эмчийн үзлэг, хяналт, шаардлагатай оношилгоо, эмчийн заалтын дагуу хийх эмийн болон физик эмчилгээ, утлага эмчилгээ зэрэг тусламж, үйлчилгээ багтана. Ингэснээр эмчийн үзлэгээр өдрийн эмчилгээ шаардлагатай гэж үзсэн хүүхэд гэртээ ойр байрлах эрүүл мэндийн байгууллагад эмчлүүлэх боломжтой болж байна.

Эцэг эх, асран хамгаалагчид хүүхэд нь халуурах, ханиалгах зэрэг томуу, томуу төст өвчний шинж тэмдэг илэрвэл харьяа өрх, сум, тосгоны эрүүл мэндийн төвд хандаж, эмчийн үзлэг, зөвлөгөө авах шаардлагатай. Өдрийн эмчилгээ хийх эсэхийг эмч үзлэгийн үндсэн дээр шийдвэрлэнэ.

Цаашид томуугийн улирлын өвчлөл, тусламж, үйлчилгээний бодит хэрэгцээнд үндэслэн санхүүжилтийг шаардлагатай тохиолдолд улирал дуустал үзүүлсэн эмчилгээний гүйцэтгэлээр тооцон санхүүжүүлэх зохицуулалтыг хэрэгжүүлэхээр ажиллаж байна.

Мөн Эрүүл мэндийн даатгалын ерөнхий газар өдрийн эмчилгээнд хамрагдсан хүүхдийн тоо, үзүүлсэн тусламж, үйлчилгээ болон даатгалын сангаас санхүүжүүлсэн зардлын мэдээллийг долоо хоног бүр олон нийтэд нээлттэй танилцуулахаар болжээ.

Хүүхэд бүр шаардлагатай тусламж, үйлчилгээгээ гэртээ ойр, санхүүгийн нэмэлт дарамтгүй авах нөхцөлийг бүрдүүлэх нь энэхүү арга хэмжээний зорилго юм.