Нөмрөгийн дархан цаазат газарт гарсан гал түймрийн байгаль орчинд учруулсан хохирлыг тооцох Ажлын хэсэг газар зүйн байршил, байгалийн болон цаг агаарын онцлогоос шалтгаалан хүндрэлтэй нөхцөлд ажиллаж байна.

Тус бүсийн газар зүйн онцлогоос хамааран зурагт хар зураасаар тэмдэглэсэн хэсгээс цааш автомашин, мотоцикл, мориор нэвтрэх боломжгүй болжээ.

Иймд Ажлын хэсгээс Улсын онцгой комисс болон Хил хамгаалах ерөнхий газарт техникийн дэмжлэг үзүүлэх боломжийг судалж, шаардлагатай арга хэмжээ авах хүсэлт тавьсан байна. Энэ хүрээнд нисдэг тэрэг ашиглах болон хөрш улсуудтай хамтран ажиллах боломжийг судалж байгаа аж.

Түймэрт өртсөн ойн сан, зэрлэг амьтдын амьдрах орчинд хүрч, газар дээр нь үзлэг хийх, дээж авах замаар байгаль орчинд учирсан хохирлын хэмжээг нарийвчлан тогтоох шаардлагатай гэдгийг Байгаль орчин, уур амьсгалын өөрчлөлтийн сайд Ц.Сандаг-Очир хэлэв. 

Тэрбээр, Хохирлыг бодитой, нарийвчлалтай тооцож, шинжлэх ухааны үндэслэлтэй дүгнэлт гаргах нь байгаль орчны хохирлыг нөхөн төлүүлэх, цаашдын нөхөн сэргээлтийн ажлыг төлөвлөн хэрэгжүүлэхэд чухал ач холбогдолтой  гэлээ.