Монгол Улсын Гадаад харилцааны сайд, Цөлжилттэй тэмцэх тухай НҮБ-ын конвенцын Талуудын 17 дугаар бага хурлын (UNCCD COP17) Дарга Б.Батцэцэг “Санхүүгийн өдөр”-ийн хүрээнд зохион байгуулсан “Fashion4Land” форумын өндөр түвшний уулзалтад оролцож, үг хэллээ.

“Загварын салбарын стандартыг чиглүүлэх нь: Тогтвортой зохицуулалтын талаар бодлогын яриа хэлэлцээ” сэдэвт тус арга хэмжээнд Засгийн газар, олон улсын байгууллага, хувийн хэвшил болон загварын салбарын төлөөлөл оролцож, салбарын байгаль орчинд үзүүлэх нөлөөллийг бууруулах, тогтвортой үйлдвэрлэлийн стандарт, зохицуулалтыг боловсронгуй болгох асуудлаар санал солилцов.

Сайд Б.Батцэцэг хэлсэн үгэндээ загварын салбарын хөгжил нь газрын доройтол, экосистемийн тогтвортой байдалтай шууд холбоотойг онцоллоо. Тэрбээр хувцас, нэхмэлийн үйлдвэрлэлийн түүхий эдийн цаана газар, ус, хөрс, бэлчээр зэрэг байгалийн нөөц төдийгүй эдгээр нөөцөөс хамааралтай иргэдийн хөдөлмөр, амьжиргаа байдгийг тэмдэглэв.

Монгол Улс дэлхийн түүхий ноолуурын үйлдвэрлэлийн 40 орчим хувийг бүрдүүлдэг бөгөөд ноолуурын салбар нь 190 мянга орчим малчин өрхийн амьжиргаатай шууд холбоотой. 

Тиймээс загварын салбарын тогтвортой үйлдвэрлэлийн бодлого нь түүхий эдийн нийлүүлэлтийн сүлжээний анхан шатанд ажиллаж буй малчид, үйлдвэрлэгчдийн амьжиргаатай уялдсан байх шаардлагатайг тэрбээр онцоллоо.

Мөн загварын салбарт шинээр нэвтэрч буй байгаль орчны стандарт, зохицуулалт нь үйлдвэрлэгчдэд нэмэлт дарамт бий болгох бус, тогтвортой, хариуцлагатай үйлдвэрлэлд шилжих боломжийг бүрдүүлэхэд чиглэх ёстойг хэлэв.

Ялангуяа жижиг, дунд үйлдвэрлэгчид, түүхий эд нийлүүлэгчид болон малчдыг шинэ шаардлагад нийцүүлэн ажиллахад шаардлагатай мэдлэг, технологи, санхүүжилтээр дэмжих нь чухал болохыг онцолсон байна.

Цөлжилттэй тэмцэх тухай НҮБ-ын конвенцын “Fashion & Land: Unravelling the Environmental Impact of Fibres” тайланд дурдсанаар дэлхийн хувцас, нэхмэлийн үйлдвэрлэлд ашиглагдах түүхий эдийн хэрэглээ 2000 онд 58 сая тонн байсан бол 2023 онд 124 сая тоннд хүрчээ.

Энэхүү өсөлт нь загварын салбарын байгаль орчинд үзүүлэх нөлөөлөл нүүрстөрөгчийн ялгарлаар хязгаарлагдахгүй, газрын доройтол, усны нөөц, биологийн олон янз байдал, экосистемийн тогтвортой байдалд нөлөөлж байгааг харуулж байна.

Иймд загварын салбарын үйлдвэрлэл, хэрэглээний тогтолцоог байгальд ээлтэй, хариуцлагатай чиглэлд өөрчлөхийн зэрэгцээ түүхий эд нийлүүлэгчид болон байгалийн нөөцөөс хамааралтай иргэдийн амьжиргааг хамгаалах нь тогтвортой хөгжлийн чухал хэсэг болохыг уулзалтад оролцогчид онцоллоо.