Сүүлийн өдрүүдэд дэлхийн олон бүс нутагт хэт халалтын улмаас ноцтой нөхцөл байдал үүсэж, эрүүл мэнд, байгаль орчин, эдийн засагт ихээхэн нөлөөлж байна.
Испани, Франц: Хэт халалтын улмаас ой хээрийн түймэр эрчимжив
Испани, Францад 40°C-ээс давсан халуун үргэлжилж, олон арван мянган га ой, бэлчээр шатжээ. Испанид энэ онд ойролцоогоор 100 мянган га газар түймэрт өртсөн бол Францад хэд хэдэн томоохон түймрийн улмаас хоёр гал сөнөөгч амиа алдаж, олон бүсэд онцгой хязгаарлалт тогтоогоод байна.
Франц: Хэт халалтын улмаас 5700 гаруй нас баралт бүртгэгджээ
Францын Нийгмийн эрүүл мэндийн байгууллагын мэдээлснээр, зургаадугаар сарын түүхэн халалтын үеэр 5764 нас баралт бүртгэгдсэн байна. Энэ нь 2003 оны Европын үхлийн аюултай халалтын дараах хамгийн өндөр үзүүлэлтүүдийн нэг болжээ. Хамгийн их хохирол Парисын бүсэд бүртгэгдсэн бөгөөд олон хүн эмнэлэг, асрамжийн газар болон гэртээ нас барсан байна.
Иймд өндөр настан, ганцаараа амьдардаг иргэдийг хамгаалах тусгай арга хэмжээ авч, Францын шуудангийн алба (La Poste)-ны шуудан хүргэгчдийг сайн дурын үндсэн дээр орон нутгийн захиргаатай хамтран ахмад настнуудын гэрээр орж, биеийн байдлыг нь шалгах, зөвлөгөө өгөх, шаардлагатай тохиолдолд нийгмийн үйлчилгээтэй холбох ажилд дайчилжээ.
Мөн сэрүүцүүлэх төвүүдийг (Cooling Centers) нээж, иргэдийг халуун цагт агааржуулалттай нийтийн барилга, соёлын төв, номын сан зэрэг сэрүүн орчинд түр байрлахыг зөвлөж байгаа бөгөөд олон нийтийн арга хэмжээнд хязгаарлалт тавих зохицуулалтыг хэрэгжүүлж байгаа аж.
Дэлхийн цаг уурын байгууллага: Баруун Европ түүхэн дэх хамгийн халуун зургаадугаар сарыг тууллаа
Дэлхийн цаг уурын байгууллага (WMO)-ын мэдээлснээр 2026 оны зургаадугаар сар Баруун Европын түүхэн дэх хамгийн халуун зургаадугаар сар, харин дэлхийн хэмжээнд хоёр дахь хамгийн халуун зургаадугаар сар болж бүртгэгджээ. Хэт халалт нь Европт үргэлжилж, Франц, Испани зэрэг орнуудад томоохон ой хээрийн түймрийг улам даамжруулж байна.
ДЭМБ: Хэт халууныг зөвхөн цаг агаарын үзэгдэл биш, эрүүл мэндийн ноцтой аюул гэж үзэх шаардлагатай
Дэлхийн эрүүл мэндийн байгууллагын Европын бүсийн захирал хэт халалтын шинэ давалгаа дахин ойртож байгааг анхааруулж, улс орнууд өндөр настан, архаг хууч өвчтэй хүмүүс, хүүхэд зэрэг эмзэг бүлгийг хамгаалах арга хэмжээг эрчимжүүлэхийг уриалжээ.
Эх сурвалж: Reuters, APnews
