Засгийн газрын хуралдаан 2021 оны 04 сарын 08-ны өдөр болж шийдвэрээ танилцуулж байна. 

Коронавирусийн халдварын тархалт эрчимтэй нэмэгдэж байгаатай холбогдуулан ЭМЯ, УОК-ын зүгээс хатуу хөл хорио тогтоох саналыг засгийн газарт хүргүүлээд байсан юм.  

Тэгвэл засгийн газрын зүгээс 2021 оны 04 сарын 10-ны 06:00 цагаас 04 сарын 25-ны 00:00 цаг хүртэл улсын хэмжээнд хатуу хөл хорио тогтоох шийдвэр гаргалаа. 

Дээрх хугацаанд иргэд гэрийн ойролцоох дэлгүүрээс хүнс, түлш, зөөврийн ус, ахуйн хэрэглээний бараа бүтээгдэхүүн, эмнэлгийн тусламж, үйлчилгээ авах, эмийн сангаар үйлчлүүлэх, буяны ажилд оролцох, газар тариалан эрхлэх, шинжилгээ өгөх болон дархлаажуулалтад хамрагдах, хязгаарлалттай тоо /нэг дор таваас ихгүй хүн/-гоор агаар салхинд гарах нь нээлттэй. Нийтийн тээвэр цагийн хязгаарлалттайгаар зөвшөөрөгдсөн салбарынханд үйлчлэх бөгөөд автомашины хөдөлгөөнийг хязгаарлана.

Ерөнхий сайд Л.Оюун-Эрдэнэ: Цар тахлыг даван туулах цорын ганц арга зам нь дархлаажуулалт юм. Одоогийн байдлаар 553 мянган иргэнийг вакцинжуулаад байна. Вакцин үйлдвэрлэгч орнууд экспортоо зогсоож, эхний ээлжид дотоодын хэрэгцээгээ хангахад төвлөрч байгаа. Гэсэн хэдий ч манай улсын хувьд вакцины татан авалтын хугацаа тодорхой болсон. Мөн удахгүй вакцины хоёр дахь тунгаа хийлгэх ажил эхлэх бөгөөд эрүүл мэндийн салбарт оргил ачаалал ирэх учир 15 хоногийн хатуу хөл хорио тогтоож байна. 

Мөн засгийн газрын зүгээс монгол улсын 3,3 сая иргэн бүрд өнөөдрөөс эхлэн 300 мянган төгрөгийг хүүхдийн мөнгө, тэтгэвэр, хувьцаа авдаг дансанд нь арилжааны банкуудаар дамжуулж олгохоор болжээ. Уг мөнгөн дэмжлэгийг 7-10 хоногийн хугацаанд багтаан түгээх аж.  Шаардагдах хөрөнгийг Оюутолгой компанийн төлсөн татварын өр болох нэг их наяд гаруй төгрөгөөс гаргах юм. 

БИЧЛЭГ ҮЗЭХ: