Засгийн газраас Төрийн албаны цалин хөлсний бүтэц, цалингийн тогтолцооны шинэчлэлийг эхлүүлсэн. Төрийн албаны цалингийн нэгдсэн тогтолцоог шинэчлэх замаар цалин хөлсийг ажилласан жил, үр дүн, бүтээмжтэй уялдуулах, төрийн зарим албан хаагчдын цалин хөлсийг тодорхой хувь хэмжээгээр нэмэгдүүлэх 5 багц асуудлыг Засгийн газрын хуралдаанаар баталсан билээ. Эдгээр арга хэмжээг хэрэгжүүлэхэд нийт 266.2 тэрбум төгрөг зарцуулахаар 2023 оны нэгдсэн төсөвт тусгагдсан.  

Үүний нэг нь төрийн албан хаагчдын ажилласан жилүүдийг үнэлж нэмэгдэл олгодог болов. Төрийн захиргааны болон үйлчилгээний албанд анх ажилд орсон албан хаагч тасралтгүй 5 жил ажилласны дараагаас ажилласан жилийн нэмэгдэл авч эхэлдэг. Мөн 6-10 жил ажиллаад 5 хувийн нэмэгдэл авдаг, 16-20 жил ажиллаад 15 хувийн нэмэгдэл авдаг, 21-25 жил ажиллаад 20 хувийн нэмэгдэл авдаг байсан. 

Энэ байдлыг өөрчилж, төрийн алба хаасан хугацааны нэмэгдлийг жил бүрээр бодож олгодог байхаар холбогдох журамд нэмэлт, өөрчлөлт оруулсан. Үр дүнд нь 160.0 мянган төрийн албан хаагчийн цалин хөлс 2-5 хувиар нэмэгдэнэ. Энэ арга хэмжээнд 50.1 тэрбум төгрөг зарцуулах юм.