Хавдартай өвчтөнүүдэд зориулсан цуврал гарын авлага “Миний гэр бүлд юу тохиолдох бол? Ээж аавынх нь хэн нэг хорт хавдраар өвдсөн хүүхэд багачуудад зориулав”, “Хавдрыг хамтдаа даван туулах нь. Хань ижилд нь зориулсан гарын авлага” номнуудыг  хэвлүүлэн дүүргийн эмнэлгүүдээр үнэ төлбөргүйгээр тарааж байна.

"Нийгмийн эрүүл мэнд дэх хавдрын хяналт" сэдвээр Австралийн Засгийн газрын тэтгэлэгт сарын сургалтанд Брисбан хотод 14 хүний бүрэлдэхүүнтэй оролцлоо.

“Өдрийн хоолоо найзуудтайгаа” хандивын арга хэмжээг 8 байгууллага ажлын байрандаа /”Элемент” ХХК, Австрали улсын сайн дурын ажилтнууд, УБТЗ-ын ХНН-ийн зорчигч тээврийн алба, замын 2-р анги, суудлын вагон депо, ХӨСҮТ-ийн лаборатори, Азийн Анагаахын Оюутны Холбоо, Архангай аймгийн ЭМГ/ зохион байгуулж биднийг дэмжлээ.

Австрали улсын сайн дурын ажилтан Линетт Смит манай байгуллагын үйл ажиллагааг дэмжин нэг жилийн хугацаатай ажиллаж эхэллээ.

Хүний хөхөнцөр вирүсийн чиглэлээр хийх дараагийн шатны судалгааны ажил Австралийн Засгийн газрын техник туслалцааны хөтөлбөрийн тэтгэлэгт шалгарч, хамтран ажиллах гэрээнд гарын үсэг зурлаа. Судалгааны хүрээнд Өмнөговь, Сэлэнгэ аймаг болон Багануур, Баянгол дүүргүүдэд ажиллан 2000 гаруй эмэгтэйчүүдийг хамрууллаа. Умайн хүзүүний хавдрын гол шалтгаан болох хүний хөхөнцөр вирүсийн тархалт болон залуу эмэгтэйчүүдийн дундах мэдлэг, дадлага, хандлагыг үнэлэх юм.

Хавдрын талаарх олон нийт, залуучуудын мэдээллийг нэмэгдүүлэх зорилготой “Хавдартай тэмцэх дэлхийн өдөр”-т зориулсан Өсвөр үеийн 64 бөхийн барилдааныг “Аварга” дээд сургуультай хамтран зохион байгууллаа.

Өмнөд Африкийн Кэйп Тауны их сургуультай хамтран монголын хууль бус тамхидалтын нөхцөл байдалд үнэлгээ өгөх зорилготой "Хууль бус тамхи"-ны чиглэлээр хэрэгжүүлэх 2 жилийн судалгааны ажлыг эхлүүлж Улаанбаатар хотын 9 дүүрэг, Баян Өлгий, Дорнод аймгуудад ажиллалаа.

Хоёр сарын хугацаатай англи хэлний хичээлийг Австралийн сайн дурын ажилтан Линетт зохион байгуулав.

Монгол орноо сурталчлах, идэвхтэй хөдөлгөөнийг дэмжих зорилгоор Австралид төгсөгчдийн Mozzies холбоо, Австралийн элчин сайдын яамтай хамтран Австралийн Анзакийн өдөрт зориулсан галт тэрэгний аяллыг Сэлэнгэ аймагт зохион байгуулж 54 хүнийг оролцууллаа.

Их хөлгөний уламжлалыг хадгалах төвтэй хамтран сарын хугацаатай хоёр удаагийн цуврал бясалгалын хичээлийг хавдартай өвчтөнүүд, тэдний асран хамгаалагч нарт зохион байгуулж давхардсан тоогоор нийт 80 гаруй хүнийг хамрууллаа.

Улсын 1-р төрөх эмнэлэг, Австралийн эх баригч эмэгтэйчүүдийн эмч нарын баг, LGBT төвтэй хамтран умайн хүзүүний өмөн, Австрали улсад хэрэгжиж буй умайн хүзүүний хавдрын эрт илрүүлэг, хүний хөхөнцөр вирүсийн эсрэг вакцинжуулалтын талаар сургалт зохион байгуулав.

УБТЗ-ын ажилтнуудад "Хавдрын эрсдэлт хүчин зүйл, сэргийлэх арга зам" сэдвээр цуврал сургалт зохион байгууллаа.

“ Achilles International Mongolia” байгууллагаас зохион байгуулсан “Итгэл найдвар боломж Улаанбаатар-2017” бүх нийтийн марафонд хамтран оролцож, хавдраас урьдчилан сэргийлэх, эрүүл зөв хооллолт, амьдралын эрүүл дадал хэвшлийн талаар зөвлөгөө өгч хэрэгцээтэй гарын авлага, материал тараав.

Идэвхитэй дасгал хөдөлгөөнийг сурталчлах зорилгоор Хүйсийн тэгш эрхийн төв, Үндэсний цэцэрлэгт хүрээлэнгийн хамт олонтой хамтран  зумба бүжгийн хичээл зохион байгуулав.

Монгол орноо сурталчлах, идэвхтэй хөдөлгөөнийг дэмжих, хандив босгох зорилгоор Дорнын говь Энергийн төв рүү аялсан Jazz галт тэрэгний аяллыг зохион байгуулж 72 хүнийг хамрууллаа.

“Сайн дурын ажилтан” хөтөлбөр хэрэгжиж эхлэн Хавдар судлалын үндэсний төвд сайн дурын хөтөч нар ажиллуулж эхэллээ.

АНУ-ын Макс Сангийн “Нэхээс бүртээ шингээсэн хайр” (With Love in Every Stitch) төслийн хүрээнд ирүүлсэн нэхмэл малгайнуудыг хүүхдүүдэд бэлэглэлээ.

Канадын Лаурел сантай хамтран ажиллаж Канад улсаас манай оронд ирж ажиллах 20 гаруй эмч нарын багийн үйл ажиллагаанд дэмжлэг үзүүлэн Архангай, Говь Алтай аймгуудад ажиллалаа.

Монгол орноо сурталчлах, хандив босгох зорилгоор Шинэ жилийн галт тэрэгний аяллыг Дархан-Уул аймаг руу зохион байгуулж 52 хүнийг хамрууллаа.

Орон нутгаас хотод эмчилгээнд ирж буй хавдартай өвчтөнүүдийг түр байрлуулах байр байгуулах төслийг санаачлан засварын ажлуудыг эхлүүлэв.

Эрүүл мэндийн зөвлөгөө бүхий “Аз жаргалын хуанли-2018" ширээний календарийг хэвлүүлэн худалдаалж байна. Таны оруулсан орлого хавдрыг эсрэг үйл ажиллагаанд дэмжлэг үзүүлэх болно.