Эрүүгийн хуульд нэмэлт өөрчлөлт оруулах тухай хуулийг өнгөрсөн 7 хоногт УИХ-д өргөн барьсан. Энэ 7 хоногт хэлэлцэн батлах юм. Үүнтэй холбоотойгоор мөрдөн шалгах ажиллагааны нууцыг задруулах гэмт хэрэгтэй холбоотой өргөн мэдүүлэх хуулийн талаар ХЗДХ-ийн сайд Б.Энхбаяр мэдээлэл хийлээ.

Тэрбээр "Мөрдөн шалгах ажиллагааны нууцыг задруулах гэмт хэрэгтэй холбоотойгоор иргэдийн мэдэх эрхэд аюул учирлаа, хэвлэл мэдээллийн байгууллагад сэтгүүлчдийн эрхэд халдаж байна, нууц гэх халхавчаар хулгайгаа далдлах гэж байна.

Энэ хүрээнд мөрдөн шалгах ажиллагааны нууцыг задруулахад өгөх ялын бодлогыг оруулах гэж байгааг эсэргүүцэж байгаа талаар МСНЭ шаардлага гаргасныг миний бие өглөө яаманд гардаж авсан. Энэ өргөн мэдүүлсэн хуулийн төсөл, мөрдөн шалгах ажиллагааны эсрэг гэмт хэргийн гол агуулгыг тайлбарлах нь зүйтэй гэж үзлээ.

Мөрдөн шалгах ажиллагааны нууцыг задруулах гэдэг энэ гэмт хэрэг 1926 оноос хойш сүүлийн 100 жилийн хугацаанд манай улсын эрүүгийн хуульд хуульчлагдсан гэмт хэрэг байсаар ирсэн. Цаашид ч байх үйлдэл. 100 жилийн өмнө энэ үйлдэл 100-600 төгрөгийн торгуулийн ялтай байсан. 1940, 1960, 1986, 2002 оны Эрүүгийн хуулиар энэ үйлдэл бүгд гэмт хэрэг байсаар ирсэн. Ингээхдээ энэ хэргээр шалгадаг, хэрэг үүсгэдэг, хариуцлага тооцдог этгээдүүд нь тусгай субъект байна. Өөрөөр хэлбэл мөрдөн шалгах ажиллагааны эсрэг гэмт хэрэг үйлдэж байгаа этгээдүүдэд жирийн иргэн, хэвлэл мэдээллийн байгууллага, сэтгүүлчид ордоггүй онцлогтойгоор хуульчлагдаж ирсэн байдаг.

Сүүлийн буюу одоо хүчин төгөлдөр мөрдөгдөж буй 2015 оны Эрүүгийн хуульд энэ үйлдлийг мөн гэмт хэрэгт тооцсон. 

Тэр дотроо мөрдөн шалгах ажиллагаанд оролцсон, байлцсан хүн гэдэгт хэргийн оролцогч болон орчуулагч, хэлмэрч, шинжээч, хөндлөнгийн гэрч, иргэний нэхэмжлэгч, иргэний хариуцагч зэрэг хүнийг ойлгоно гэдэг Монгол Улсын дээд шүүхийн тайлбартайгаар хүчин төгөлдөр үйлчилж байгаа.

Үүнийг хэвлэл мэдээллийн байгууллага, сэтгүүлчид ойлгохдоо нууцыг задруулж байгаа хүн гэж биднийг, иргэдийг хэлээд байна гэж ойлгоод олон нийтэд ташаа ойлголт төрүүлсэн байна.Үүнийг буруутгахгүй. Хуулийг хүн бүр ойлгож мэдэх албагүй, төөрөгддөг. Тиймээс түүхэн хөгжлөөс нь эхэлж тайлбарлаж байгаа нь энэ юм.

Мөрдөн шалгах ажиллагааны нууцыг задруулж байгаа "хүн" гэж Эрүүгийн хуульд заасан этгээд нь сэтгүүлчид бид байна гэж ярьж байна. Тэгвэл манай улсын Дээд шүүхийн тайлбараар Эрүүгийн хуульд заасан "хүн" гэдэгт тусгай субъект гэж л ойлгодог. Тэр “хүн” гэж хөндлөгийн гэрчийг хэлж байгаа юм" гэлээ.

БИЧЛЭГ ҮЗЭХ: