Сүүлийн өдрүүдэд манай томоохон бизнесийн группүүдийн нэг болох MCS өөрийн компанийн багагүй хувийг Америкийн нэгэн компанид зарах гэж буй талаар мэдээлэл гарах боллоо. Тэгвэл MCS-тэй хэлэлцээр өрнүүлж байгаа гэх АНУ-д бүртгэлтэй Cerberus гэж ямар компани, тус компанийн босс Стивен Эндрю Файнбург гэж хэн бэ.

Өдгөө 59 настай энэ хүнийг жирийн нэгэн бизнесмэн биш гэдгийг дэлхийн хэвлэлүүдээр гарсан мэдээллүүд батална. Түүнийг Нэгдсэн Улсын тусгай алба буюу тагнуулын байгууллагатай нууц сэжмээр холбогддог гэх бөгөөд одоогоос нэг жилийн өмнө Ерөнххийлөгч Дональд Трамп Тагнуулын төв газрын даргаар томилуулахаар зүтгүүлээд бүтэлгүйтэж байжээ. Учир нь сөрөг хүчин болох Ардчилсан Намынхны зүгээс хүчтэй эсэргүүцэлтэй тулгарсны улмаас Трампын энэ санал амжилтанд хүрэлгүй унасан аж. Ардчилсан Намын нөлөө бүхий улстөрчид энэ нөхрийг хууль бус мөнгөтэй холбоотой байж болзошгүй аюултай этгээд гэж үзсэн учраас тэр.

Бүр Жорж Бушийг Ерөнхийлөгч байх үеэс зэвсгийн наймаа, их хэмжээний мөнгөтэй нэр нь холбогддог байсан энэ эрхмийг Оросын зарим хэвлэлд “Мэргэжлийн тагнуулч, тусгай агентаар бэлтгэгдсэн этгээд” хэмээн бичжээ.

Түүний эзэмшлийн Cerberus Capital групп нь Америкийн хамгийн том буу үйлдвэрлэгч компани болох Freedom-ыг эзэмшдэг гэдгийг ч гадаадын хэвлэлүүдийн мэдээ батална. Тэр ч бүү хэл Жорж Бушийн шууд оролцоотойгоор Америкийн арми 2003 онд Ирак руу довтлоход Стивен Файнбургийг хөшигний цаанаас голлох үүрэгтэй оролцсон гэж үздэг хүмүүс ч Нэгдсэн Улсад олон бий.

Энэ нууцлаг эрхэм 2016 онд Трампыг Ерөнхийлөгч болгохын тулд сонгуулийн кампанит ажлыг нь их хэмжээний мөнгөөр ивээн тэтгэж байснаас гадна Америкийн Тагнуулын байгууллагыг толгойлохын тулд удаа дараа улайран зүтгээд амжилт ололгүй ялагдаж байсан гэх. Учир нь ганц Трамп ч биш, Жорж Буш түүнийг Тагнуулын дарга болгохоор оролдоод мөн л сөрөг хүчнийхний эсэргүүцлээс болж бүтэлгүйтэж байжээ.

Манай үндэсний томоохон аж ахуйн нэгж болох MCS-ийн 25 хувийг 100 гаруй сая ам.доллараар худалдан авахаар хэлэлцээр хийж буй гэх Cerberus групп, түүний толгойлогч Стивен Эндрю Файнбургийн мөрөөр мөшгихөд нэг иймэрхүү.

Эх сурвалж: Militarytimes.com, ABCNews.go.com, Russia Today