Ховдоос Говь-Алтай аймгийг хооронд нь холбосон засмал зам дээр 2022 онд хоёр бөхөн машинд дайрагдаж үхсэн. Монгол бөхөн ус уухын тулд энэ цэгээр зам хөндлөн гардаг ажээ.

Анхааруулах тэмдгийг өвөрмөц хэлбэр, хэмжээтэй хийсэн бөгөөд тэмдгийн үзэгдэх байдлыг нэмэгдүүлэхийн тулд бөхөнгийн биеийн бодит хэмжээнээс том хэмжээтэйгээр хийсэн байна. Зэрлэг амьтад бидэнтэй зэрэгцэн амьдардаг гэдгийг санаж жолооч та бүхэн холын замд анхаарал болгоомжтой явна уу. 

МОНГОЛ БӨХӨН /Saiga tatarica mongolica/

Монгол бөхөн бол мөстлөгийн үеийг давж чадсан нэн эртний түүхтэй, дэлхийн ховордсон 100 амьтны нэг билээ. 

Эрдэмтдийн үзэж буйгаар 10 зүйл бөхөн амьдарч байснаас өнөөдөр 9 зүйл бөхөн устаж үгүй болоод зөвхөн нэг зүйл бөхөн үлдэж хоцорчээ. Энэ нэг зүйл бөхөн нь Монгол бөхөн болон Соргог бөхөн хэмээн 2 салбарладаг. Соргог бөхөн ОХУ, Казахстан, Узбекистан, Киргизстан, Туркменистанд тархан амьдарч байгаа бол Монгол бөхөн зөвхөн Монгол орны баруун бүс нутагт тархжээ.

Гадаад шинж байдлын хувьд Монгол бөхөн нь соргог бөхөнгөөс биеэр жижиг, эмэгчин бөхөн нь эвэргүй, зун улаан шаргал, өвөл цайвар саарал, нялх янзага бор хүрэн зүстэй байдаг.

Монгол бөхөн нь цөлөрхөг хээрийн эрүүл байдлыг илтгэгч юм. Малд хортой баглуур ургамлыг идэж, тархан ургахыг хязгаарладаг бол өөрөө бүргэд, чоно зэрэг махчин амьтдын идэш тэжээл болсноор тэдгээр амьтдыг оршин тогтноход оролцоно. Монгол бөхөн нь дунджаар 3-4 жил насалдаг богино амьдралтай амьтан. Эдүгээ тоо толгой нь 14000 орчим болж өсчээ.