Харвардын их сургуулийн Төрийн удирдлагын сургуульд  өчигдөр  "Монголын хөгжлийн форум" зохиогджээ. Тус сургуулийн монгол оюутнууд болох Б.Отгонбат, С.Эрдэнэболд, Б.Ундрал, Г.Цолмонбаатар, Б.Уянга, С.Санасэр, Э. Цовоо нарын зохион байгуулсан уг форумд Харвард, Массачусетсийн технологийн их сургууль болон Бостон орчмын сургуулиудад багшилж, сурч байгаа монгол судлаачид, оюутнууд, түүнчлэн дэлхийн 70 гаруй орноос Харвардад сурч буй оюутан, судлаачид өргөнөөр оролцсон байна.

Монгол орноо олон улсад илүү ихээр сурталчилах,  хөрөнгө оруулалт татах, дэлхийд тэргүүлэгч судалгаа шинжилгээний институтын хэмжээнд монголын сайн нэрийг бататгах зорилгоор  уг үйл ажиллагааг жил бүр уламжлал болгон зохион байгуулахаар санаачилсныг Харвардын их сургуулийн судалгааны хүрээлэнгүүд санхүүжүүлжээ. Харвардын Төрийн удирдлагын сургуулийн 2015 оны төгсөгч Л.Оюун-Эрдэнэ, Д.Идэр,  Бизнесийн сургуулийн төгсөгч О.Батнайрамдал эх орноо сурталчилах арга хэмжээг өнгөрсөн жил анх удаа хийсэн ажээ.

Энэ удаагийн форумд Монгол Улсаас АНУ-д суух Онц бөгөөд бүрэн эрх Элчин сайд Б.Алтангэрэл, НҮБ-ын дэргэд суугаа Онц бөгөөд Бүрэн эрхт Элчин сайд, Байнгын төлөөлөгч С.Сүхболд, ЗГ-ийн Хэрэгжүүлэгч агентлаг, Хөрөнгө оруулалтын газрын дарга С.Жавхланбаатар, НИТХ-ын Тэргүүлэгчдийн Нарийн бичгийн дарга Б.Энхболд нарын төлөөлөгчид, Харвардын их сургуулийн нэр хүндтэй, нөлөө бүхий профессорууд болох Рикардо Хаусмэн, Дэвид Кинг, Стив Жардин нарын зочид, Мянганы сорилтын сангийн төлөөлөгчид оролцон илтгэл тавьж хэлэлцүүлэг хийсэн байна.

 Эх орныхоо хилийн дотор өвөр зуураа тушилцаж суух бус олон улсын хэмжээнд өрсөлдөх чадвартай Монголыг бүтээхэд хүн бүр эрвийх дэрвийхээрээ хүчээ нэгтгэхийг зохион байгуулагч залуус уриаллаа.