АНУ-ын Thinkmodo компани замын түгжрэлд удаан зогсох дургүй жолооч нарт зориулан Hum rider нэртэй тун сонирхолтой машиныг зохион бүтээжээ.
Уг төслийг Jeep Cherokee Wagon автомашины үйлдвэрт хэрэгжүүлсэн байна. Энэ машины цоо шинэ гайхамшиг юу вэ гэвэл тэвшийг нь гурван метр орчим өндөрт өргөх хүчин чадалтай механизм тавигдсанд оршино гэж Mashable мэдээлсэн байна. Ганцхан товчлуур дээр дарснаар машины кабиныг дээш өргөхтэй зэрэгцэн дугуйнууд нь хоёр талруугаа тэлэгдэж өмнөх машинуудын дээгүүр чөлөөтэй явж өнгөрөх юм байна.
Энэхүү машиныг бүтээхэд Jeep Cherokee Wagon стандартын машины загварт зарим нэг өөрчлөлт оруулан, жин өмнөх загвараасаа хоёр дахин нэмэгдэж дөрвөн тонн болсон байна. Мөн бусад хөдөлгөөнд оролцогч машинуудыг гэмтээж сэвтээхгүйн тулд дөрвөн талдаа видеокамераар тоногложээ. HumRider машиныг Калифорни мужийн Ланкастер хотын гудамжаар туршилтад оруулсан байна.