Дэлхийн олон оронд шинэ жилийн баяраар уламжлал болон тоглогддог, 120 гаруй жилийн түүхтэй “Цөмөөхэй” бүжгэн жүжгийн тавилтыг шинэчлэн үзэгчдэд хүргэсээр энэ өвөл дөрөв дэх удаагаа толилуулах гэж байна. 

Дуурийн театрын тайзнаа гайхамшигт цас будралтаараа анх үзэгчдийн сэтгэлийг хөвсөлзүүлж,  зургаан см-ээс 9 см хүртэл өндөр болох гацуур модоор чимсэн тайзнаа агаарын том бөмбөлөг хөөргөсөн гээд “Цөмөөхэй” балет үзэгчдийг жинхэнэ утгаараа үлгэрийн гайхамшигт орноор аялуулдаг юм. Тийм л гойд сонин мэдрэмжийг төрүүлж чадахуйц хараа булаам тайз засал, хувцаслалт нь АНУ-ын “Бостон балет” компанийн бүтээл ажээ.

Дэлхийн сонгодог урлагийн соёлыг эх орондоо авчирч, олон улсын хэмжээнд үнэлэгддэг олон чадварлаг бүжигчдийг харж бишрэх боломжийг монгол үзэгчиддээ олгож байгаагийнх нь төлөө Соёлын элч, МУГЖ Д.Алтанхуягт сонгодог урлагийн фенүүд үргэлж талархалтай ханддаг. Түүний зургаан жилийн өмнө үүсгэн байгуулсан  “Монголын балетын хөгжил сан”-гийн гадаад харилцаа улам бүр өргөжин тэлсээр байгаа гэнэ.  Энэ жилийн “Цөмөөхэй”-д БНСУ-ын  Korea Youth Ballet Stars компанийн бүжигчид оролцон тоглоно.

Түүнчлэн “Цөмөөхэй” балет жил бүр олон арван хүүхдийг оролцуулан, театрын алтан тайзнаа бүжиглэх мөрөөдлийг нь биелүүлэн, хүүхэд насных нь мартагдашгүй дурсамжийг бүтээдэг билээ. Энэ удаад “Цөмөөхэй” балетд оролцох 8-17 насны хүүхдүүдийн  сонгон шалгаруулалтаар нийслэлийн бүх балетын сургуулиудаас 110 хүүхэд шалгаруулж авсан байна. МУГЖ Д.Алтанхуягийн байгуулсан "Монголын үндэсний балет сургууль"-ийн хүүхдүүдтэй нийлээд энэ жилийн тоглолтонд 180 хүүхэд оролцоно. Гол дүрийн Клара охины дүр бүтээх эрхийн төлөөх хамгийн өрсөлдөөнт шалгаруулалтанд Б.Эмүжин, Б.Анаргэрэл нар шалгарчээ.

 "Монголын балетын хөгжил сан"-гийн гадаад харилцааны хүрээнд МУГЖ Д.Алтанхуяг өнгөрөгч онд Франц, Куба, БНСУ болон Нью-Йорк, Шанхай, Бостоны балетын сургуулиудтай ажлын уулзалт хийж багш, сурагчдын солилцоог 2018 оноос эхлүүлэхээр болсон сайхан мэдээтэйгээр тус хамт олон “Цөмөөхэй”-гөө амилуулах нь ээ.