Цахилгаан автомашин үйлдвэрлэдгээрээ алдартай “Тесла” компанийн гүйцэтгэх захирал Элон Маск компанийнхаа үндсэн ажлыг хийхээс гадна байгальд ээлтэй өөр олон шинэ технологийг туршиж үзэх хүсэлтэй нэгэн юм. Элоны толгойд байшингийн дээврийг эко хавтангаар хийх санаа эртнээс төрж, тэрээр энэ төлөвлөгөөгөө удаан бодож явжээ. Тэрээр мөрөөдлийн санаагаа саяхан бодит ажил болгож чадсан гэдгээ хэвлэл мэдээллээр олон нийтэд зарласан билээ.

 Эко дээвэр нь харахад ердийн нэг чулуун, эсвэл тоосгон хавтангаас ялгарахааргүй  ч энэ хавтангийн ид шидийг мэдэх хүмүүст бол энэ нь байгальд ээлтэй шинэ шинэ ноу-хау болж чадсан хэмээн шуугицгааж байна. Учир нь энэхүү хавтан нь нарны эрчим хүчийг өөртөө хуримтлуулах замаар байшинг бүхлээр нь тогоор хангах хүчин чадалтай бөгөөд нар тусаагүй үед ч хуримтлуулсан эрчим хүчээ удаан хугацаанд найдвартай хадгалж чаддаг давуу талтай.

 Элон Маскын өөрийнх нь ярьснаар түүний санаачлан зохион бүтээсэн энэхүү шилэн, эко хавтангаар байшингаа дээвэрлэхэд ердийн чулуун юм уу тоосгон хавтангаас илүү бага зардал орох гэнэ. Европ болон Америкт төрөл бүрийн чулуун, тоосгон хавтангаар амины орон сууцаа дээвэрлэхэд нэлээдгүй өндөр зардал гардаг аж. Тиймээс шилэн-эко хавтанг санаачлагч Элон Маск анхнаасаа шинэ бүтээлээ зохион бүтээхдээ аль болох зардал багатай, хямд төсөр байхаар бодож, тооцоолжээ.