Монголын эрүүл мэндийн салбарт анх удаа эмч, сувилагч, эрүүл мэндийн байгууллагын ажилтан, судлаач болон салбарын залуу мэргэжилтнүүдийг нэгтгэсэн "Эрүүл мэндийн салбарын залуучуудын холбоо" байгуулагдлаа.

Тус холбоо нь эрүүл мэндийн салбарын залуучуудын манлайлал, оролцоог нэмэгдүүлэх, хамтын ажиллагааг бэхжүүлэх, мэргэжлийн хөгжил, инновац, шинэ санаачилгыг дэмжих, залуу үеийн дуу хоолойг салбарын бодлого, шийдвэр гаргах түвшинд хүргэх зорилготой юм.

Мөн эрүүл мэндийн салбарт ажиллаж буй залуу мэргэжилтнүүдийг нэгтгэн, мэдлэг, туршлага солилцох, манлайлах ур чадварыг хөгжүүлэх, судалгаа, инновац болон сайн дурын үйл ажиллагааг дэмжихийн зэрэгцээ үндэсний болон олон улсын байгууллагуудтай хамтын ажиллагааг өргөжүүлэх чиглэлээр үйл ажиллагаа явуулахаар төлөвлөж байна.

Цаашид холбоо нь залуу боловсон хүчний санал, санаачилгыг бодит ажил хэрэг болгох, хамтын ажиллагааны тогтолцоог бэхжүүлэх, ирээдүйн манлайлагчдыг бэлтгэхэд чиглэсэн төсөл, хөтөлбөрүүдийг хэрэгжүүлэхээр зорин ажиллах юм.

Өнөөдөр эрүүл мэндийн салбарын тогтвортой хөгжил нь зөвхөн эмчилгээ, үйлчилгээний чанараас гадна хүний нөөцийн чадавх, залгамж халаа, шинэ үеийн манлайлагчдыг төлөвшүүлэхтэй салшгүй холбоотой болсон. Энэ утгаараа "Эрүүл мэндийн салбарын залуучуудын холбоо" нь салбарын залуу мэргэжилтнүүдийг нэгдсэн зорилго, үнэт зүйл дор нэгтгэж, хамтран хөгжих, туршлага солилцох, мэргэжлийн болон манлайллын ур чадвараа дээшлүүлэх боломжийг бүрдүүлэхийн зэрэгцээ эрүүл мэндийн салбарын хүний нөөцийн тогтвортой хөгжилд бодит хувь нэмэр оруулах чухал платформ болох юм.