Тансаг зэрэглэлийн автомашин үйлдвэрлэгч Роллс Ройс, нисэх онгоц үйлдвэрлэгч шилдэг компани болох Эйрбус болон Германы технологийн гигант Сиеменс хамтран хайбрид хөдөлгүүртэй нисэх онгоц бүтээх ажлыг хамтран эхлүүлсэн гэдгээ албан ёсоор зарлалаа. “E-Fan X Programme” нэртэй энэхүү лут том төслийг хэрэгжүүлэгч дээрх гурван компани ердөө хоёрхон жилийн дараа буюу 2020 он гэхэд нисэх онгоцоо агаарт хөөргөхийг хүсч байгаа юм. 

Тэднийг ийнхүү яарч адган хөдлөх болсон шалтгааныг мэргэжлийн хүмүүс Европын холбооны зүгээс дээрх компаниудад байнга ирж буй дарамт шахалттай холбоотой хэмээн тайлбарлаж байна. Учир нь Европын холбоо, түүний гишүүн улсуудын засгийн газрууд агаарын бохирдлыг бууруулахын эсрэг дорвитой арга хэмжээ авахгүй байна хэмээн томоохон компаниудад байнга сануулга өгөх болсоор удаж буй юм. Хэрэв том үйлдвэрлэгчид дээрх сануулгыг үл тоомсорлосоор байвал цаашид их хэмжээний торгууль төлөх шаардлагатай болохыг ч үгүйсгэхгүй. Тиймээс ганц дээрх гурван компани төдийгүй бусад технологийн компаниуд ч үүнтэй төстэй төсөл хөтөлбөрүүдийг цаашид олноор нь хэрэгжүүлэх сонирхолтой байгааг хэлэх хэрэгтэй. Сиеменс, Роллс Ройс, Эйрбусын удирдлагууд саяхан болсон хэвлэлийн бага хурал дээр “Бид шаардлагатай бол энэхүү төсөлд хэдэн арван сая долларын хөрөнгө оруулалтыг компани тус бүрийн зүгээс хийхэд бэлэн байгаа” хэмээн мэдэгдсэн нь анхаарал татаж буй аж. Дээрх гурван компанийг хариуцсан хэвлэлийн төлөөлөгчийн тус хэвлэлийн бага хурал дээр хэлснээр хайбрид нисэх онгоцны төслийг хэрэгжүүлэгч дэлхийн бусад компаниуд 100 хувь цахилгаан хөдөлгүүрийг одоо болтол амжилттай туршиж, хэрэгжүүлж чадахгүй байгаа.

Харин “E-Fan X Programme” төсөл нь түүхэнд анх удаа бүрэн хайбрид хөдөлгүүртэй. Ямар ч шатахуун хэрэглэдэггүй иргэний зориулалттай нисэх онгоц бүтээж чадна гэдэгтээ итгэлтэй байгаа аж.

Нисэх онгоц бүтээгч бусад компаниудын үзэж байгаагаар энэхүү төсөл 2020 он гэхэд амжилттай хэрэгжиж чадах юм бол цаашдаа 100 хувь цахилгаан хөдөлгүүртэй агаарын хөлгийн эрин үе эхлэх нь ойлгомжтой гэнэ. Учир нь онгоц үйлдвэрлэгч компаниуд технологийн хүчин чадлын хувьд ийм түвшинд аль хэдийнэ хүрсэн боловч хэтэрхий их өртөг зардал гарахаас болгоомжлон иймэрхүү төслийг хэрэгжүүлэхээс татгалзаж буй явдал юм. Тиймээс дээрх гурван компанийг зоригтой, санаачлагатай байна хэмээн магтахаар өөр аргагүй болж байна.

Эх сурвалж: BBC